每当我想念故乡，想念双亲，就会得做一道家乡土菜（下）

时间：2023-09-15

　　原创沈嘉禄海上梦叠

　　来源：文汇笔会

　　作者：沈嘉禄

　　沪语改写、讲述：牛美华

　　文字、语音审核：丁迪蒙

　　编辑：王乙其

　　往期回顾：

　　咸鲞鱼炖蛋

　　我是深有体会个。勒我个学生时代，姆妈常庄拿故乡个土菜端到饭桌浪来，伊拉是霉千张、苋菜秆、糟带鱼、鲞鱼蒸肉饼、霉干菜烧肉唠啥。有趟，我拨一碗臭豆腐蒸猪脑吓着了，从来没想着搿两种低微个食材可以同框，金灿灿个老菜油流泻勒烟青玉白之间，世俗大美无须藏拙。

　　我跟仔姆妈到绍兴柯桥去过五六趟，故乡个河埠头、大石桥、乌篷船、老台门，散发着湿热雾气搭酸甜味道个草堆，对了，还有屋檐下头个燕子窠，伊拉构成了故乡个光影搭仔气息。但是，假使没姆妈亲手烹饪个土菜，乡愁也勿至于搿能个浓郁、搿能个温馨、搿能个静谧——特别是勒大热天个中浪，一阵阵夜胡翅个鸣叫声。

　　苋菜秆、臭豆腐、霉千张合蒸，名曰“臭三宝”

　　现在，姆妈离开已经整整三十年了，每趟我想念故乡，想念双亲了，就会得做一道家乡土菜。慢慢叫品味，好像回到了故乡，回到了童年。伊种味道非但只是刺激味蕾，还有更加让我欣喜、知足、清醒个感觉。姆妈是乡愁个摆渡人。

　　勿单是小赵，勒我有幸接触到个新上海人当中，表示勿识乡愁是啥物事个还勿勒少数。可能伊拉摆脱乡村背景、扑向城市个心情过于急切；可能伊拉勒成长过程当中对外部世界个兴趣过于浓厚，以至于对乡间生活个细节熟视无睹；可能伊拉勒告别家乡个伊个一刻，就决定要拿记忆清零。壮怀激越，云帆高挂，可能还有淡薄个愤恚搭仔惆怅。葛末现在，我想应该是小赵拉重建乡愁个辰光了。

　　黄鱼鲞炒毛豆子

　　勒拥抱城市生活个前提下头，重建搭故乡个关系，是必要个文化建设搭仔心理建设，是对自家“从阿里来”个再次确认，假使讲，搿是恋母情结个返乡，搿也就是一趟精神浪个能量加载。我相信，伊拉勒学讲上海话、品尝上海菜个辰光，勒搭上海小姑娘谈朋友，再到勒黄浦江边安家落户个辰光，会得发现自家搭故乡连结个伊个根脐带还勒海个。

　　勿要有啥顾虑，上海本来就是移民城市，勒小赵来个前头个一百多年里向，有成千上万个小赵拎勒简单个行李勒十六铺上岸，然后开始人生个崭新旅程。我个父母就是搿能介到上海来个。百川归海个小赵拉，勒双休日或者假期里，勿要总归去叫外卖，吃快餐，匀出眼辰光，以自娱自乐个心态做几样家乡个菜肴、点心，犒劳自家、招待亲友。乡愁，就勒故乡风味个甜酸苦辣当中出来了。